Við heimild í § 2, stk. 3 í løgtingslóg nr. 20 frá 10. mars 1992 um innflutning og sølu av rúsdrekka hevur landsstýrið fyrisett:
§ 1. Apoteksverkinum er loyvt at innflyta og selja ethanol til tekniska nýtslu og heilivágsframleiðslu.
§ 2. Sølan kann bert fara fram, tá ið keyparin leggur fram skrivliga váttan frá Arbeiðseftirlitinum, ið sigur, at neyðugt er at nýta ethanol til ta í § 1 nevndu nýtslu og hvørja nøgd.
§ 3. Niðanfyri nevndu stovnum nýtist ikki at leggja fram ta í § 2 nevndu váttan, um so er, at stovnsleiðarin frá apoteksverkinum biður um ávísa nøgd og við trú og heiður skrivliga váttar, at stovnurin skal nýta ethanolið til ta í § 1 nevndu nýtslu:
1) Apoteksverkið.
2) Sjúkrahúsverkið.
3) Skúlar.
4) Heilsufrøðiliga Starvsstovan.
5) Føroya Náttúrugripasavn.
6) BIO-FAR verkætlanin.
§ 4. Stovnar sambært § 3 skulu skráseta, hvussu ethanolið er nýtt.
§ 5. Tær í §§ 2 og 3 nevndu váttanir skal apoteksverkið skjalgoyma í 2 ár.
§ 6. Toll- og Skattstova Føroya hevur eftirlit við, at ethanolið verður nýtt til ætlaða endamálið.
§ 7. Brot á hesa kunngerð verður revsað við bót.
§ 8. Henda kunngerð fær gildi dagin eftir, at hon er kunngjørd. Samstundis fer úr gildi kunngerð nr. 36 frá 19. november 1954 um keyp og sølu av kumpasspritti.